كيف أسوي متجر الكتروني؟

جتني قبل يوم قريبة لي تسألني، أفنان كيف أسوي متجر الكتروني؟ فقلت في نفسي: هل فيه وقت أفضل من هذا أكتب فيه تدوينة عن هذا الموضوع؟

أكتب هذا الموضوع بصفتي صديقة وفتحت عدّة متاجر من عام ٢٠١٤ اثنين منها لأشخاص آخرين، بالإضافة لشغفي الشديد ناحية الموضوع. ( يعني ماني أكبر خبيرة بالموضوع لكن ممكن أحط رجلك على عتبة البداية ).

وبما إننا انتهينا من المقدمة تعالي أقولك بالخطوات وش المفروض تسوين،

١-اختاري تخصص المتجر، ويساعدك في هذا إنك تراجعين اهتماماتك، وش تحبين؟ مين تتابعين؟ هل عندك هواية معينة؟ أو إنك تشاركين شخص عنده اهتمام ومعرفة دقيقة بمجال معين، مثال: أكثر شي تبحثين عنه وتهتمين فيه هو الجديد بعالم المكياج، وتحبين تتابعين خبيرات التجميل، هنا أنتِ بتعرفين وش المفروض توفرين بمتجرك وش “الهبة”، وطبعًا ممكن دائمًا تستعينين بأشخاص آخرين شغوفين بمجال تبغين تفتحين فيه متجر ( ما أتوقع أصحاب أكبر متاجر المكياج مثلًا كانوا كلهم شغوفين بالمكياج لكن استعانوا بصديق ☺️) أتمنى وضحت الفكرة. وما أنصح بالبداية إنك تختارين تخصص عام جدًا أو أكثر من تخصص خصوصًا لو ميزانيتك بسيطة، وممكن دايمًا إنك تبدين بتخصص وتتفرعين منه.

٢- بعد ما تختارين التخصص اختاري الاسم وألوان المتجر وضروري يكون يدل على التخصص (وحطي ببالك التخصصات اللي بتتفرعين لها لو ناوية تتفرعين) مثلًا ما يناسب تسمّين متجر بتضيفين له منتجات متعلقة بالبيت “الكترونياتي” لأنه يعطي انطباع انك جالسة تبيعين الكترونيات بس، وهكذا.. أو اختاري اسم عامّ وارتاحي ☺️ مثلًا (الروائع) ممكن يكون متجر تضيفين له تخصصات زي ما تحبين بالمستقبل. والألوان برضو نفس النفس الشي والأسود والأبيض دايمًا خيار أنيق ومناسب لكل شي.

٣-سوي حسابات بكل وسائل التواصل الاجتماعي بنفس الاسم، كلها نفس المعرّف (حتى اللي ما تبين تستخدمينها حاليًا احجزي الاسم فيها).

٤-سويّ اللوغو بناءً على الاسم والألوان اللي اخترتيها، يساعدك في هالشي موقع اسمه كانفا، يوفر لك قوالب جاهزة تغيرين فيها باللي يناسبك، الموقع سهل الاستخدام وأشوفه ضروري بأيامنا هذي خصوصًا للي يهتمون بالمحتوى، فيه خطتين مجانية ومدفوعة المدفوعة فيها خيارات أكثر لكن المجانية برضو مفيدة.

٥-صوري المنتجات، يساعدك فيه هذا المنتج عبارة عن خيمة تصوير (للمنتجات الصغيرة فقط) اللي بالرابط ما جربته، اللي استخدمته أنا من شي إن لكن حاليًا مو متوفر لو توفر حدّثت التدوينة، لأن أهم شي بالتصوير الاضاءة. لكن لو كان عندك مكان نور الشمس يدخله بشكل جيد ممكن يكفيك، ابحثي باليوتيوب عن “تصوير المنتجات بالجوال”, ويساعدك على تعديل الصور برنامج اسمه “LightRoom” من أدوبي.

٦- سوي حساب لمتجرك في تطبيق سلّة وأضيفي المنتجات وضبطي اعدادات الشحن والدفع (سلة تطبيق يساعدك تسوين متجر من أ إلى ي) بسهولة ويسر وفيه لها شروحات كثيرة باليوتيوب.

٧- وفري أغراض الشحن والتغليف، أيًا كان طريقة التغليف اللي ناوية تستخدمينها، ولو كنتِ بتستخدمين كراتين عادية والتغليف الفقاعات المتجر هذا طلبت منهم أكثر من مرّة سريعين وبالنسبة لغيرهم أسعارهم تعتبر مناسبة (أكيد لو نزلتِ محلات الجملة بتحصلين أرخص لكن الطلب أسهل وأسرع)، ملاحظة: ما لي أي فايدة من المتجر ولا هو تابع لي.

٨-وفري رابط معروف، لكن حاليًا الموقع له فترة موقف للصيانة ولا أعرف السبب.

٩-وفري رقم خاص للشغل واحتفظي بأرقام العملاء لأن الرسائل مستقبلًا بتكون قناة دعائية مجانية لك، قاعدة العملاء مهمة جدًا.

١٠- وهنا يبدأ الشغل الحقيقي ☺️! سوقي لمنتجاتك، سواء باستخدام دعايات الانستقرام مثلًا أوقروبات واتساب بالبداية، أو تعلنين مع مشهور وهذا اللي ما أنصح فيه أبدًا خصوصًا بالبداية، وبيساعدك بتنسيق محتوى انستقرامك الموقع الذي ذكرته سابقًا: كانفا. وفي خدمة “التسويق بالعمولة” على تطبيق سلة، يعني توفرين لكل شخص رابط خاص له وياخذ نسبة من أرباحك على كل شخص يشتري عن طريقة. وأشوفها ممتازة.

-لا تتوقعين إن الربح بيجي من أول شهر أو حتى سنة، لو بدأ يشتغل بعد شهرين ثلاثة ( ويغطي تكاليفة بس بدون ربح ) يعتبر هالشي ممتاز، فلا تستعجلين.

-أي شي تبيعينه رجعي فلوسه مباشرة للمتجر، لا تصرفين ولا ريال وخليك دقيقة بالحسابات.

التدوينة كتبتها على عجالة عشان ألحّق أفيد البنت اللي ذكرتها بداية التدوينة ☺️ وبحدّث التدوينة باستمرار بإذن الله، لو فيه جزء مو واضح أو أي استفسار ببالك لا تتردين بالسؤال، (أأتكلم بصيغة المؤنت لأن غالبية متابعين هم كذلك).